jueves, 21 de septiembre de 2017

Xuntanza Campesina

A primeros d'esti añu, la conseyera d'agricultura d'Asturies anunciaba L'ANTEPROYECTU DE LLEI DE CALIDÁ AGROALIMENTARIA. Dicho d'otra manera, ta desenvolviéndose, por primer vez n'Asturies, una llei que va regular los tres segmentos que vertebren el sector agroalimetariu: producción, industria y distribución, asina como a los diferentes conseyos reguladores de marques de calidá (DO, IGP, COPAE...). Poro, va resultar fundamental pa definir les bases pa la vida nel y col campu asturianu.
Al empar, un grupu de persones campesines del centru d'Asturies empezó a facer conceyos col envís d'organizase en defensa de los nuestros intereses colectivos. Nacía asina XUNTANZA CAMPESINA. La Xuntanza Campesina, una vez abierto'l plazu de consulta pública pal anteproyectu de llei, presentó una batería d'alegaciones y aportaciones al textu pa que fueren teníes en cuenta de cara al borrador final de llei que va discutise na Xunta Xeneral.
Darréu, faise una esbilla de LES ALEGACIONES que se consideraron oportunes:

- Esta llei nun recueye los intereses d´un gran númberu de persones que se dediquen a la agricultura de manera non profesional y que saquen la so producción al traviés de la venta directa d'escedentes agroalimentarios en mercaos y places y al traviés de les Canales Curties de Comercialización (CCC). Un colectivu qu'en munchos casos utiliza la venta directa como mediu pa complementar pequeñes economíes familiares - polo xeneral, precaries enforma - basaes na vida nel mediu rural.
Sería xusto que l'Alministración reconociere'l papel d'esti colectivu como principal conservador de la vida, el paisaxe, la cultura, les costumes y la sostenibilidá del entornu rural asturianu, cola so participación y presencia activa nos distintos organismos, instituciones e instrumentos d'interlocución que s'articulen a partir de esta llei, al traviés de la presencia d'asociaciones de vendedores, asociaciones de vecines de la zona rural, grupos de campesines, etc.

- Midíes de flexibilización de la lexislación de calidá agroalimentaria p'apoyar les canales curties de comercialización y pa productores pequeñes. Debería ser abondo'l cumplimientu de les Guíes de buenes práctiques, que tendríen que ser elaboraes ente campesines, instituciones y consumidores.

- Simplificar y flexibilizar la burocracia (el control de fitosanitarios, el rexistru de venta directa, disminuir el númberu de formularios y trámites diferentes,...). Establecer un control de trazabilidá únicu pa les distintes instituciones.

- Formación de les campesines pal autocontrol n'actividaes d'elaboración o tresformación, asina como un acompañamientu y asesoramientu tresversal por parte de l'alministración.

- Facilitar formación y ferramientes a les campesines pa llevar a cabu'l seguimientu, rexistru y control de los productos.

- Asegurar la participación de los axentes sociales, económicos y de la sociedá civil - incluyendo sindicatos, cooperatives, asociaciones, colectivos vecinales y de campesines, grupos de consumu y entidaes similares- nel diseñu y na aplicación de la política alimentaria. Potenciar los instrumentos d’interlocución y concertación qu’aseguren l’adecuación de les actuaciones de l’alministración a les necesidaes del sector alimentariu.

- Creación d'un sellu, distintivu o indicador de venta de producción local o de proximidá nos comercios minoristes, mercaos locales... qu’acredite qu’ellí véndensen productos de proximidá y sostenibles, como forma d’incentivar les canales curties de comercialización, la economía local y el consumu responsable.
- Promocionar los modelos de producción propios de la Comunidá Autónoma, los mercaos internos, la producción local, les canales curties de comercialización, les variedaes de semiente local y la producción ecolóxica.

- Difundir y informar sobre la calidá de los productos alimentarios impulsando'l conocimientu y consumu de los productos de temporada. Destacar tamién los aspectos históricos, tradicionales, culturales, la so vinculación al territoriu, les innovaciones y les elaboraciones nueves.

- Fomentar les relaciones de confianza ente les campesines y les consumidores nes canales curties de comercialización.

- Destinar fondos públicos pa fomentar el consumu del productu local en forma de campañes publicitaries, presencia tresversal nos planes educativos, espaciu nos medios públicos de comunicación, etc

- Declarar Asturies como un territoriu llibre de tresxénicos.

Agora tamos a la espera de qu'empiece'l debate parlamentariu de la Llei definitiva que va rixir el nuestru futuru como xente del campu. Llegáu esi momentu, el campesináu d'Asturies va tener que tar presente otra vuelta, vixilando'l procesu, presionando y aportando les nuestres idees. Ye por ello necesariu qu'esta xera nun quede reducida a un grupu de persones de la redolada de Siero. Fai falta una visión más global de la realidá del campu d'Asturies pa que naide quede excluyida.

¡Organízate y participa!


La prósima asamblea va ser el 29 de setiembre, a les 17:00h, nel Llar El Mataderu en La Pola, Siero.

Si quies ponete en contactu con nós: xuntanzacampesina@gmail.com